УДЭТ-н театрын ажилчид дундаас коронавирусын 54 тохиолдол илэрчээ


Улсын драмын эрдмийн театрын ажилтнууд дундаас 54 хүний шинжилгээнд коронавирусын халдвар илэрсэн гэх мэдээлэл байна.

Тус театр нь энэ сарын 4-өөс эхлэн Анна Каренина жүжгээ тайзнаа тавиад байсан юм. Харин вирус илэрсэнтэй холбогдуулан тус жүжгийн тоглолт цуцлагдсан талаар тус театр албан ёсоор мэдэгдэл хийжээ.

Өнөөдрийн тоглолт цуцлагдсан бөгөөд тeатрын бусад ажилчид гэртээ тусгаарлагдаад байгаа талаар эх сурвалж мэдээллээ

МЭДЭГДЭЛ

Улсын драмын эрдмийн театрын эрхэм үйлчлүүлэгч, үзэгчид Та бүхэнд энэ өдрийн мэндийг хүргэе. Нийслэлийн Сүхбаатар дүүргийн онцгой комиссын 2021 оны 03 дугаар сарын 07-ны өдрийн 13/7/12 дугаартай албан мэдэгдэл, холбогдох хууль дүрэм журмыг үндэслэн коронавируст халдвар /Ковид-19/-ын тархалт нэмэгдэж байгаатай холбогдуулан үзэгчид, уран бүтээлчид, ажилтан, албан хаагчдынхаа эрүүл мэнд, аюулгүй байдлыг хангах зорилгоор 2021 оны 03 дугаар сарын 07-ны өдрөөс 14-ны өдрийг хүртэлх хугацаанд тоглогдох байсан Анна Каренина жүжгийн тоглолт цуцлагдсаныг үүгээр мэдэгдэж үзэгч та бүхнээсээ хүлцэл өчье.

Иймд эрхэм үйлчлүүлэгч та бүхэнд дээрх хугацаан дахь худалдан авсан тасалбарыг тоглолт зөвшөөрөгдсөн үед шилжүүлэн үзэх, тасалбар буцаалт хийх боломжтой болохыг үүгээр уламжилж байна.

Жич: Анна Каренина жүжгийн (зөвшөөрөгдсөн) тоглолтын хуваарийн мэдээллийг цахимаар урьдчилан мэдэгдэх болно. Мөн тоглолтын тасалбарыг Улсын драмын эрдмийн театрын касснаас худалдан авсан бол (99250387) дугаараар холбогдох, www.ticket.mn сайтаас худалдан авсан бол (90101800, 1900-1800) дугаарт холбогдож буцаалт хийх боломжтой болно.

Хүлээцтэй, эерэг хандлагатай үйчлүүлэгч Та бүхэндээ баярлалаа

УЛСЫН ДРАМЫН ЭРДМИЙН ТЕАТР – 2021 оны 03 дугаар сарын 07

error: Content is protected !!